Koia ko te kaupapa o tēnei atikara e aropā nui nei ki ngā karakia tūturu i takina i roto i ngā rā whakamaumahara o Te Riri Pākehā, arā, e mōhiotia ana ko Te Pūtake o te Riri, tae atu hoki ki ngā karakia tawhito i oti i roto i ngā tau maha ki ngā wānanga mau rākau, ki ngā momo tohi me ngā tikanga o te ao Māori. Ko te tapu o ngā karakia tūturu o tēnei ao, he rerekē ki te tapu o ngā karakia o te ao tūāuiruri whāioio o ō tātou tūpuna (Wānanga Karakia Māori, 2000). Waimarie kai te mau tonu i te tokoiti puta noa i Aotearoa ētahi o ngā karakia tawhito o tua whakarere, me te aha kai te kaha haere te tipu o te mate oha ki te ako i ngā karakia Māori. Engari, ko te ara aka whai i ngā karakia tūturu ehara i te mahi tamariki, ehara mō te katoa, kai tūpono ka tānoanoatia. Kua kite ahau i wētahi, kua poka noa ki te raweke i ngā taonga a koro mā, nāwai, ā, kai raro e putu ana. Ki tētahi kōrero hoki, ki te hē te whāwhā i ngā karakia tūturu, he tangata tonu te utu i te mea he atua hae ngā atua Māori (Milroy & Temara, P., kōrero ā-waha, 2004). Ko te nuinga o ngā tāngata e mōhio ana ki ngā karakia tūturu he mea i tohua e ngā pākeke, i tohia rānei e te tohunga. He kāwai heke, he kura huna kai roto i te toto. Nō reira he hapa kore te taki i ngā karakia tawhito, ko te tohunga taki i ngā karakia tūturu he tangata e mōhio ana ki ngā kōrero tuku iho, ki ngā whakapapa, ki ngā tikanga, ki te reo rangatira, ki te whēkite i ngā tūtohu o te wā. He mōhio ia ki ōna marae, he mōhio hoki ōna marae ki a ia. Ehara te whai i ngā karakia tūturu i te mahi tamariki, i te mahi mā te kūare, te kore mōhio, koinei te tapu o tua whakarere (Wānanga Karakia, 2000). Ko te reo taki i ngā karakia tūturu kia mārama, kia koi, kia mauritau (Tutua, kōrero ā-waha, 2005). E tautoko ana i ngā kōrero a Shane Te Ruki o ngā hapū o Ngāti Te Unu, o Ngāti Kahukura o te iwi o Ngāti Maniapoto, arā, ko te karakia Māori ehara i te karakia patipati, he whakahau kē i ngā atua o te pō, i ō tūpuna atua, te kāhui o ngā atua. Otirā, he māmā noa iho te whaihanga i ngā karakia tūturu ki ngā kaupapa huhua o te wā, ahakoa he aha te kaupapa (Waka Huia, 2018). I pēnei hoki māua ko taku pāpara, a Te Makarini Temara, i whaihangatia e māua he karakia Māori hei ako atu ki ngā tauira o te wānanga.