COMMENTARY Nā te hangarau tōku reo Māori i tāmi, mā te hangarau tōku reo Māori e hāpai

Whakarāpopototanga: Ahakoa ōna painga anō, ko tetahi hangarau i pā kino nei ki te iwi Māori, ko te reo irirangi kawe reo Pākehā. Neke atu i te rau tau ia e whakapāho mai ana i te reo Pākehā ki ngā hapori o Aotearoa. Nā wai rā, ka noho tangata whenua te reo Pākehā nei ki te iwi Māori, ā, ka noho manuhiri kē, ko tōna ake reo Māori. Heoi anō , kua kite noa te Māori, ka whai oranga tōna reo, menā he hangarau pēnei anō kai ōna ringaringa hai kawe ake i tōna reo Māori ki ōna iwi katoa. Ināianei, kua eke ki te rua tekau mā rima tau te pakeke o te nuinga o ngā reo irirangi kawe reo Māori, rua tekau katoa nei. Kai ia iwi tōna reo irirangi me āna whakaputunga pitopito kōrero hai whakapāhotanga, hai whakatauiratanga, hai rangahautanga, hai whakamahitanga mā ngā hangarau rorohiko maha o nāianei.