Te orokohanga o Te Aho Matua

Ko Te Aho Matua (2008) te tūāpapa o ngā kura kaupapa Māori o Aotearoa. Ko tā tēnei tuhinga, he tirotiro i ngā mahi a ngā manu tāiko hei whakatū i ngā kura kaupapa Māori. Kei tēnei pepa hoki he whakamāramatanga e pā ana ki te take mō te tuhinga o Te Aho Matua. Ko tōna tikanga, he tautake Te Aho Matua e whakakotahi ana i ngā kura kaupapa Māori e whakaū ana ki te whakarauora i te reo Māori me te whakatairanga i ngā tikanga Māori. Kei Te Aho Matua ngā aratohu kaupapa here mā ngā whānau me ngā pouako hei whakahaere i te kura mō ngā tamariki tau 1–8. He whakahokinga mahara tēnei tuhinga ki ngā whawhai a ngā kaihanga i whakapau kaha ki te whakatū i ngā kura kaupapa Māori ki Tāmaki Makaurau me te tuhi i Te Aho Matua. I te tīmatatanga, nō te whānau o te kōhanga reo rātou, ōtira i te ngoikoretanga o ngā kura auraki ki te whakawhanake tonu i te reo o ā rātou tamariki, i huri rātou ki te whakatū i ā rātou ake kura. Kāore hoki i tautokohia e te kāwanatanga. Nā te kaha o ngā wero a ngā whānau nei, i tuohu mai te kāwanatanga ki ā rātou tono. Nā reira, i whakaturetia ngā kura kaupapa Māori e te kāwanatanga i te tau 1989, kia whiwhi pūtea ai rātou. Whai muri i tērā, i whakaturehia hoki Te Aho Matua i te tau 1999.